Die Medien und der Sturm-Koarl – Ausgabe 1

„Mei, wenn i an den Samstog zruckdenk … Des woa a Jubel! Eine Begeisterung, wie man sichs goa net vorstellen hätt können nach diesen furchtborn, furchtborn letzten Runden. Da Schwoaze hot endlich wieder a Hetz ghobt! I man, es woa jo davor a nie schlecht, oft vü Pech dabei – St. Pölten zum Beispü – aber wennst dann, so wie vuagestan, 3:0 gegen den Zweiten gwinnst, schaut die Soche hoit glei vü besser aus. Gfeiert is wurn, in den ganzen Beisln rund ums Stadion – Jessas! I man, i net! Is ma nur zu Ohren kumman. Für mi is des jo nix mehr. I mog des nimma, de vüln Leit – do griag i Angst wenn is so vü Leit auf an Haufn siach. Waßt jo nie, wos ois passieren kennt in Zeiten wie diesen. Und so laut überoll. So liab klan, daham vorm Fernseher – des mog i. Wievü woan im Stadion? Siebnahoib Tausend? Ah eh. Na i werd eh wieder amoin hinschaun, wenn`s passt. Woa jo im Meisterjoahr a drin – seitdem nimma. Und i muass sogn, als Stadionbesucher waß ma jo a nur sehr, sehr wenig. Ma is und bleibt a Uninformierter. I bin jo draufkumman, wennst da die Matches daham im Fernsehn mit am Kommentator vom Foch aunschaust und dir die Toge nochm Spü die Zeitungen durchliest, dann kennt ma si hoit a wirklich aus, wos bei Sturm so los is. Nur so griagt ma – wie sogn die Jungen heit? – Insiderwissen. Immer dieses Englische überoll.. aber de Erkenntnis hob i den meisten anderen voraus. Woa i jo oft in meim Leben – den Mitmenschen an Schritt voraus. Des hob i lernen miassn, scho ois junger Mensch. Sonst wär ich niemals zu dem gewordn, was ich heute bin!

Na, nimm zum Beispü des Wochenend her, zag i da, wos i man: Olle redens schlecht vom Piesinger – mei Neffe zagt ma immer so Sochn von SturmNetz und anderen im Internet und wos die Leit so drunter schreiben auf dem Facebook – lies i ma zum Beispü die Krone durch – ein etabliertes Blatt -, siach i den Langen im Team der Runde, na bam, denk i ma. Himmel Schimmel weißes Ross! Wos wisstsn ihr eigentlich, ihr Internet-Höldn?  Üwahaupt, dass olle immer wichtig keppln miassn und so vü schlecht gred` wird, des ärgert mi schun. Dann werd i frustriert. Hul i ma a Tschocklad, dann wirds bessa – loss i im Mund zergehn, vergeht die Zeit bis zum nächsten Spü.

Wie a beim Foda in den letzten Wochn und Monaten, wo dauernd ois in Frog gstöllt wurdn is, des hot mi a immer gstört, so im Hinterkopf. Unwahrheiten san des teilweis! Direkt Verbrecherisches kummt do aussi, wenn jeder ois sogn derf, so wie`s heitzutogs eben da Foll is. Do hots a scho andere Zeiten gebn, ma Liaba.. Jedenfolls dann lies i „Trainer-Fuchs“ in den seriösen, also in den Printmedien – fühl i mi bestätigt. Heast, wos der uns schu Millionen einigspült hot in die Kassa! Cupsieg hot a uns brocht! Meister-Trainer is a! Das Beste, was diesem Verein jemols hätt passieren können. Man müsst eam hoit amoi in Ruah orbeiten lossn – glaub ma wos, ich sehe über dem Tellerrand hinweg!

Aber i wü mi do jetzt net wieder aufregen miassn, gibt jo grod kan Grund dazua. I gfrei mi jedenfolls aufs Spü am Sonntag gegen Rapid. Wenn da österreichische Rekordmeister wieder kummt. Historische Momente, i sog eana wos. Denk i an des 81er Joahr zruck.. ah do kennan sie si net erinnern? Do woans no net auf da Wöt? Aso, Sie san jo no völlig grün hinter die Augn! Najo … sans hoit no a junger Bua. Furchtbore Szenen, kennan sie si net vuastöln. Meistertitel vaspüt.. Aber olles Schnee von gestern. Na, do werd i scho ganz aufgeregt, wenn i an Sunntog denk. Es wuselt direkt, kennan sie des a? Des Gfühl im Bauch? Ah, ausm Stadion, aha.. Kurvn? Ah geh, heans auf.. Hob i ihnan eh scho gsogt. Do drüben auf da Couch, 6er Tragerl, ORF – da kommt Freude auf! I glaub, i werd ma a schnö ane Chips huln gehn. Zur Beruhigung. Beim Kreizschnopsn späta zittrige Händ – des kann i net brauchen. Wir segn`si die Toge oder Wochn – wie`s hoit passt.  Bis dahin, schen brav bleiben und vor ollm wachsam!

Grüße vom Sturm-Koarl.“

mit bestem Dank an Helmut Qualtinger und Carl Merz