„Hawedere Roman!“

Jetzt is a weg, da Roman. So schnöll geht des. Jo, jo..

Hawedere, wos hot der Zwerg net olles geben, daumois, ois Aktiver. Scho in da Gruabn, aber dann später erst, in Liebenau, in da goldenen Ära. Meine Güte, woar des eine Begeisterung! Ein Jubel! Wie si der durt in seine Gegenspieler verbissen hot – sowos sichst heit nimma. Und ganz egal, wer des woar… Wie Manchester in Graz gspüt hot, die Ranglereien mitm Beckham… mein Neffen hob i dabei ghobt, fünfhundert Schilling hot des Kinderabo für die drei Matches in da Meisterliga kost`, hob i eam zoit, dem Gschroppn, a poar Tog davor in da Münzgrobnstroßn am Bau ghacklt, guat vadient – cash auf die Haund vasteht si. Do woar de Dauerkortn locker drin.

Da Dragan wuit jo zerst a mitgehn`, a Kolleg von da Baustö daumois, is aber recht deppert hergaungan: Am Hamweg vom Schepfn is eam beim Linksobbiagn ana in sein 85er Regata einigfoahrn, irgend so a Ingenör vom Puchwerk. Jo, sei Blinka woar hin… Eigentlich is kam wos passiert, trotzdem die Kiwarei kumman. Da Dragan hot blosn – 2,3 Promü. Da Ing. sofurt a Hoiskraussn obn ghobt und da Dragan sei Aufenthoitsgenehmigung net gfundn – najo, er hot jo a goa kane ghobt. Homsn mitgnumman Jakomini aufi, vier Tog is a durt bliebn. Immerhin hot si die Baufirma vier Nächte lang die Unterkunft gspoart, danoch homs irgendwaunn zuasperrn miassn. I bin glei vorher gaungan, hob mi auszoin lossn. „Meine Herrn“, hob i gsogt, „ich bin ein rechtsschaffender Bürger! Sechstausend Schilling zu dem, wos ausgmocht woar, und wir segn uns nimma.“ Do homs  net lang überlegt, hot jo nur zwa-drei geben durt, die der deutschen Sprache mächtig woarn. Danoch bin i kortnkaufn gfoahrn.

Und jo, des Spü gegen Manchester werd i wui nimma vergessen! Nochm Match bin i mitm Klanan gaunz owi in die erste Reih, durt beim Spielertunnel, zerst a poar Engländer aungmault – woarn eh nur bunte, so ehrlich muass ma sein – und wie ma dann aber den Roman gsegn hom, homma einiplärrt „Mählich, wink amoi! Mählich, wink amoi!“ Und da Roman … hot uns aungschaut, grinst und gwunkn! Des woar scho, muass i gaunz ehrlich sogn, a großer Moment in meim Leben. Hot mi prägt und mitgeformt.

Mein Neffn scheinboar net so. Der sitzt immafurt, der Pülcha. Und lauta Kavaliersdelikte… Unlängst hot a an vulln Bierbecher aufs Föld ghaut, Linienrichter am Schädl troffn, Platzwundn… Darfst jo goar net laut sogn eigentlich.. Host es eh bestimmt irgendwo glesn. Spatzenpost oder so. Aber wos wüst mochn, wos sui ma tuan? Er hätt si a bissl mehr von mir oschaun suin.

Aber gfreit hob i mi, wie`s dann nochm Deitschn ghaßn hot, da neie Sturmtrainer is Roman Mählich! Jawoll, wie da Kühbauer bei Rapid, hob i ma docht – a Kämpfer, a Hawara – nur in intellektuell. Der richt´ denan Buam die Wadln wieder viri. Der peppt de Truppn wieder auf. I woar wirklich überzeigt davon, weil des is jo a genau mei Stil! Schließlich woar i beim Mülitär und Disziplin hob i durt glernt fürs Leben!

Nur heitzutog interessiert des leider kan mehr, so scheints. Jeder mocht, wos a wü.. Durt demonstriens wengan Wetter – i man, an wen soll des gricht sein? An den Petrus oda wos? Wos bringt des? Scho richtig so, dass die He do amol gscheit drüberfoahrt, des kost uns olln nur Göd! – aundaswo feierns Ibizapartys, so als wär des a Gemeinde in Österreich … jedenfolls kaunnst zuaschaun dabei, wie die Gesöschoft immer mehr vakummt. Und wundern brauchst di dann a net, wenn Fuaßbolla gleich lasch drauf san. Lauter Freigeister, unkonkret und Ausdruckstänzer, denan kannst ka Disziplin beibringan. Und des is a des woahre Problem mit dera Maunnschoft! Daran is da Roman gscheitert. Ana der letzten echten Hackler! Jetzt liegt er auf Sardinien in da Sunn…

Mochs guat, Kaumpfgösn und zag da Wöt, wos du wirklich kaunnst!

Grüße vom Koarl